Градоначалникот на Валандово наместо за новогодишно украсување, средствата ќе се пренаменат за деца со попреченост во Валандово!

Градоначалникот за Фокус: Наместо за новогодишно украсување, средствата ќе се пренаменат за деца со попреченост во Валандово!

По реакции на граѓаните, Општина Валандово одлучи годинава да не одвои средства за украсување на градот по повод новогодишните празници. Наместо китење, средствата е планирано да се пренаменат за уредување на нови простории за потребите на Дневниот центар за деца со попреченост од општината. Оваа одлука ја соопшти градоначалникот Перо Костадинов, и наиде на поздрав од страна на јавноста.

-Во овие тешки времиња за целото човештво, во план ни беше барем малку да го разбиеме сивилото и да го украсиме градот пред празниците. Постапката веќе беше започната, но голем дел од граѓаните јавно го изразија својот став дека не е време за украсување и славење, додека луѓе се борат со вирусот, а секојдневно расте бројот и на оние кои ја изгубија битката со вирусот. Јас секогаш го слушам гласот на народот, затоа и овие постапки беа стопирани, а планираме средствата во висина од околу 500.000 денари да бидат пренаменети таму каде сега се навистина многу потребни – за „Фокус” вели градоначалникот Костадинов.

Додава дека во Дневниот центар кој го посетуваат деца со попреченост ќе бидат уредени нови простории, бидејќи тоа му е потребно на градот, и секако на овие деца кои не смеат да бидат занемарени никогаш, а посебно во ек на пандемијата.

-Во нашата општина има околу 50 активни случаи на вирусот, едно лице ја изгуби битката со болеста. Мораме да бидеме солидарни и сплотени, кога поголемиот дел од народот смета дека не е време за украсување и празнична еуфорија, разбирливо е дека ќе сториме се што е во наша можност и ќе го слушнеме гласот на граѓаните – ни изјави Костадинов

Leave a Reply

Your email address will not be published. Required fields are marked *